Mirzə Ağamurad oğlu Cəbiyev 22 fevral 1925-ci ildə Astara rayonunun Hamoşam kəndində anadan olub.
1943-cü ildə Mirzə Cəbiyev könüllü şəkildə orduya xidmətə gedib. O, 1944-cü ildə kiçik leytenant rütbəsini alıb. Cəbiyev Belarus, Litva, Polşa və Almaniyada olan döyüşlərdə iştirak edib.
Mirzə Cəbiyev 6 aprel 1945-ci ildə Keniqsberq ətrafındakı (hazırda Rusiya, Kalininqrad) döyüşlərdə komandir olduğu bölmənin önündə kanalı keçərək, 5 fortu (istehkam) zəbt etmişdi. Cəbiyev şəxsən 8 nəfər düşməni məhv edib və 13 nəfər əsir götürərək, yaralanıb. O, bu şəhərin ən hündür qalasına qələbə bayrağını sancıb. Bu səbəbdən 19 aprel 1945-ci ildə “Sovet İttifaqı Qəhrəmanı” adına layiq görülür və bu adı qazanan ən gənc azərbaycanlı olur.
Mirzə Cəbiyev sonralar “Lenin”, “Qırmızı ulduz”, “Şərəf” və s. orden və medallarla təltif olunub.
Cəbiyev müharibədən qayıdandan sonra müxtəlif vəzifələrdə çalışıb, uzun illər Hamoşam kəndində təsərrüfat rəhbəri işləyib. O, 1960-cı illərdə heç bir texnikadan istifadə etmədən, yalın əllə mürəkkəb relyef şəraitində yerləşən Hamoşam kəndinə ilk avtomobil yolu salıb.
Heydər Əliyev Mirzə Cəbiyev haqqında deyirdi ki, ona dəfələrlə şəhərə köçmək, böyük vəzifələrdə işləmək təklif edilsə də, o, doğma kəndindən ayrılmamış və oradakı əhaliyə əlindən gələn köməyi etmişdi.
Mirzə Cəbiyev 10 fevral 1978-ci ildə vəfat edib və Astara şəhərində dəfn olunub. Sonradan doğmalarının xahişi ilə qəhrəmanın nəşi Hamoşam kəndinə gətirilərək, orada torpağa tapşırılıb.
Hazırda Astara şəhərində Mirzə Cəbiyevin büstü qoyulub, mərkəzi küçələrdən birinə və şəhərdəki məktəbə onun adı verilib. Astara rayonunun Hamoşam kəndində isə Cəbiyevin ev-muzeyi var. Həmçinin Kalininqrad şəhərində onun adı Keniqsberq ətrafındakı döyüşlərdə iştirak edənlərin siyahısında və xatirə lövhəsindədir.
Qeyd edək ki, Mirzə Cəbiyevin nəvəsi Çinar Mühəddin oğlu Əliyev 2008-ci il yanvarın 4-də Ağdam bölgəsində hərbi xidmət vaxtı düşmənlə üzbəüz mövqedə təxribatın qarşısını alarkən şəhid olub.
