Tələt Ağalar oğlu Şıxəliyev 1 yanvar 1928-ci ildə Masallı rayonunun Digah kəndində anadan olub [1]. O, Talışxanovlar nəslinin nümayəndəsidir [2].
Şıxəliyev 1946-1951-ci illərdə Əzim Əzimzadə adına Azərbaycan Dövlət Rəssamlıq məktəbində, 1952-1961-ci illərdə isə Kiyev Milli Mədəniyyət və İncəsənət Universitetində təhsil alıb [1].
1962-ci ildən rəssamın əsərləri respublika və xarici ölkə sərgilərində nümayiş olunmağa başlayıb. O, “Abşeron məktəbi” kimi tanınan rəssamlardan ibarət qrupun üzvlərindən biri olub [2].
1972-ci ildən Tələt Şıxəliyev kətan üzərində qızılı-sarı palitrası və enerjili fırça vuruşları ilə seçilən özünəməxsus üslub yaradıb [3]. Rəssam daha çox portret və mənzərə janrında çəkirdi. Həmçinin rəssamın “Oğlumun portreti”, “Gənc rəssam”, “Qızım yatarkən”, “Uşaq və pişik” kimi tabloları uşaqların istək və arzularını ifadə edir.
Rəssamlar İttifaqının sədri Xalq rəssamı Fərhad Xəlilov Tələt Şıxəliyev haqqında deyib: “...Onun yaradıcılıq emalatxanasında və sənət görüşlərində rəssam dostları ilə apardığı qızğın müzakirələr hər kəsdə böyük maraq doğururdu. Müxtəlif yaradıcılıq istiqamətlərində çalışan rəssamları ətrafına toplayardı. Hər bir rəssamın yaradıcılığına hörmət hissi ilə yanaşar və uğuruna uşaq kimi sevinərdi”.
Tələt Şıxəliyev 1982-ci ildə “Əməkdar rəssam” adına layiq görülüb [2].
Onun fərdi sərgiləri Bakıda 2008 və 2014-cü illərdə, Moskvada isə 1980-ci ildə təşkil edilib [1,2].
Şıxəliyevin əsərləri Bakı muzeyləri ilə yanaşı, həm də Moskvadakı Tretyakov Qalereyasında və Şərq Xalqları İncəsənəti Muzeyində, eləcə də ABŞ-də, Avropa, Asiya və Yaxın Şərq ölkələrinin şəxsi kolleksiyalarında saxlanılır [4].
Tələt Şıxəliyev 1 iyul 1987-ci ildə Bakı şəhərində vəfat edib [1].
Ədəbiyyat:
