Bu gün Azərbaycanda Novruz bayramının ilk çərşənbəsi - Su çərşənbəsidir. Bu çərşənbə, həmçinin “əzəl çərşənbə” adı ilə də tanınır.
Azərbaycanın Cənub bölgəsində yaşayan talışların qədim adət-ənənələrinə görə, Su çərşənbəsi günü sübh tezdən qızlar bulaq üstünə gedər, əl-üzlərini yuyar, axar suyun üstündən tullanar, suya ürəklərini açar, evə qayıdarkən isə bardağı və ya kuzəni su ilə doldurub, evə apararlar. Gətirilmiş suyun bir hissəsi bərəkət rəmzi olaraq həyətə tökülər, bir hissəsi isə gələn ilin həmin çərşənbəsinə kimi evdə saxlanılar. Talışlar bu suyu “bərəkət suyu” adlandırırlar.
Su çərşənbəsində Novruz bayramına hazırlıqlar başlayır. Həmin gün Cənub bölgəsində süfrələr təmiz sudan hazırlanmış pürrəngi çay, müxtəlif şirniyyat və yeməklər, əsasən də plovla bəzədilir.
