1 oktyabr 1918-ci ildə Azərbaycan Xalq Cumhuriyyətinin (AXC) Nazirlər Şurasının qərarı ilə Bakı Dairə Məhkəməsinin tərkibində prokurorluq orqanları fəaliyyətə başladı.
17 iyul 1998-ci ildə ümummilli lider Heydər Əliyev hər il 1 oktyabr tarixini Azərbaycan Respublikası Prokurorluğu işçilərinin peşə bayramı günü kimi qeyd edilməsi ilə bağlı Sərəncam imzalayıb.
Müstəqil Azərbaycanın prokurorluq orqanlarının tarixi AXC-nin yaranmasından sonra başlayıb. 18 noyabr 1918-ci ildə Nazirlər Şurası tərəfindən “Azərbaycan Məhkəmə Palatası haqqında Əsasnamə” təsdiq edilib. F.Xoyski, X.Xasməmmədov, A.Səfikürdski, T.Makinski AXC-nin ədliyyə nazirləri, eyni zamanda baş prokurorları olublar.
1920-ci ilin aprelində AXC süquta uğrayıb və Azərbaycan Sovet Sosialist Respublikası elan edilib. Bununla da dövlət orqanları ilə yanaşı, prokurorluq və istintaq orqanları da ləğv edildi. 11 iyul 1922-ci ildə Azərbaycan Mərkəzi İcraiyyə Komitəsinin “Azərbaycan SSR-nin dövlət prokurorluğu haqqında” dekreti ilə Azərbaycan SSR-də sovet prokurorluğunun əsası qoyuldu.
1991-ci ildə Azərbaycan öz müstəqilliyini yenidən bərpa etdikdən və Heydər Əliyevin hakimiyyətə qayıdışından sonra prokurorluq orqanlarının fəaliyyəti ilə bağlı “Prokurorluq orqanlarında qulluq keçmə haqqında”, “Konstitusiya məhkəməsi haqqında”, “Vəkillər və vəkillik fəaliyyəti haqqında” kimi çoxsaylı qanun və məcəllələr qəbul edilib.
