Baloğlan Mirzağa oğlu Abbasov 15 dekabr 1919-cu ildə Lənkəran rayonunun Sütəmurdov kəndində anadan olub.
O, Lənkəran Subtropik Bitkilər Texnikumunu bitirdikdən sonra kənddəki təsərrüfatda işləyib.
Abbasov 1939-cu ildə sovet ordusu sıralarına çağırılıb, 1941-ci ildə Ukrayna, 1942-ci ildə isə Stalinqrad (Volqoqrad) cəbhələrində vuruşub. O, xidmət etdiyi hissədə snayperlik hərəkatının təşəbbüsçülərindən biri olub [1]. Serjant Baloğlan Abbasov 51 günə 106 faşisti məhv edib, usta atıcılar arasında birinci yer tutub. Onun təlim keçdiyi snayperlər tərəfindən isə həmin zaman 615 faşist öldürülüb [1,2].
Baloğlan Abbasov 19 noyabr 1942-ci ildə sovet qoşunlarının hücumu zamanı döyüşdə həlak olan taqım komandirinin yerinə təyin edilib və öz bölüyü ilə almanlarla əlbəyaxa döyüşə girərək, onları mövqelərindən qovub [3].
Baloğlan Abbasov 23 noyabr 1942-ci ildə Stalinqrad vilayətinin Qorodişenski rayonunda düşmənin möhkəmləndirilmiş məntəqəsinə hücum zamanı həlak olub [4]. Ölümündən sonra Qırmızı Bayraq ordeni ilə təltif edilib. O, həmçinin “İgidliyə görə” medalını, Ali Baş Komandanlığın təşəkkürünü alıb. Stalinqrad cəbhəsi Hərbi Şurasının qərarı ilə Abbasovun adı əbədi olaraq qvardiya diviziyası şəxsi heyətinin siyahısına daxil edilib [1].
Şəkər Aslanın “Mən qayıtmasam”, Mirhafiz Bahadırın “Berlinə açılan tüfəng” poemaları, Etibar Əhədovun “Odlu izlərlə” sənədli povesti Baloğlana həsr olunub [1].
Rus yazıçısı Pyotr Pavlenkonun 1943-cü ildə Moskvada “Baloğlan Abbasov” adlı kitabı nəşr olunub. Həmin kitabda yazılıb: “Əgər azərbaycanlı şair qəhrəman haqqında mahnı demək istəyirsə, qoy bu mahnını Baloğlan Abbasova həsr etsin…Əgər o, bənzəmək istədiyi qəhrəmanın adını çəkmək istəsə, qoy cəsarətlə Baloğlan Abbasovun adını çəksin…Ey insanlar! İyirmi üç yaşında əbədiyyətə qovuşan Baloğlan Abbasovu unutmayın. İgidlik göstərib onunla kifayətlənən adam hələ qəhrəman deyildir; əsl qəhrəman o şəxsə deyirlər ki, başqalarını da Baloğlan Abbasov kimi özünə bənzəməyə öyrətsin” [5].
Hazırda Lənkəran şəhərində küçələrdən biri onun adını daşıyır və Kənarmeşə kəndində idarə binasının qarşısında qəhrəmanın abidəsi ucaldılıb. Stalinqradda Mamay təpəsində qoyulan abidə kompleksində Abbasovun adı həkk edilib [1].
Ədəbiyyat:
