Hacırza Musarza oğlu Əliyev 1953-cü ildə Lənkəran şəhərində anadan olub.
O, ilk təhsilini indiki Lənkəran şəhər Həzi Aslanov adına 3 nömrəli tam orta məktəbində alıb. Daha sonra Əliyev indiki Azərbaycan Dövlət Mədəniyyət və İncəsənət Universitetində Teatr rejissorluğu fakültəsində oxuyub. Həmin təhsil müəssisəsində o, SSRİ Xalq artisti, professor Mehdi Məmmədovun sinfində olub. Hacırza universiteti bitirdikdən sonra Lənkəran teatrına təyinat alıb.
Hacırza Əliyev 1983-1984-cü illərdə M.Yermolova adına Moskva Dram Teatrında ixtisasını təkmilləşdirib. O, Moskva şəhərində olarkən A.Safronovun “Yerin cazibəsi”, F.Şillerin “Qaçaqlar”, Ş.Aslanın “Sən kimsən, ata?” kimi pyeslərinə quruluş verib.
Əliyev 1989-cu ildən Lənkəran Dövlət Dram Teatrının baş rejissoru kimi işləməyə başlayıb. Onun ilk işi 1979-cu ildə İ.Əfəndiyevin “Unuda bilmirəm” tamaşası olub. Hacırza Əliyevin quruluş verdiyi tamaşalar sırasında 1980-ci ildə N.Vəzirovun “Hacı Qənbər”, 1981-ci ildə H.Ziyanın “Sınaq”, 1982-ci ildə L.Ustinovun “Məhəbbətsiz şəhər”, 1986-cı ildə Ç.Yusifzadənin “Saray oyunları” və digər yazıçıların əsərlərini qeyd etmək olar.
Hacırza Əliyev 2 aprel 1989-cu ildə avtomobil qəzasında dünyasını dəyişib.
