Mehriban Arif qızı Əliyeva 26 avqust 1964-cü ildə Bakıda anadan olub.
O, 1981-ci ildə Bakı şəhərinin 23 nömrəli orta məktəbində oxuyub. Əliyeva Azərbaycan Dövlət Tibb İnstitutuna daxil olaraq, təhsilini daha sonra Birinci Moskva Dövlət Tibb İnstitutunda davam etdirib.
Əliyeva 1995-ci ildə Azərbaycan Mədəniyyət Fondunu yaradıb. Hazırda o, həmin fondun rəhbəridir. Bundan əlavə, 2004-cü ildən Mehriban Əliyeva ulu öndər Heydər Əliyevin həyatının öyrənilməsi və milli dövlətçilik ideyalarının təbliği məqsədi ilə yaradılmış Heydər Əliyev Fonduna rəhbərlik edir.
Mehriban Əliyeva 21 fevral 2017-ci ildə Azərbaycan Respublikasının Birinci vitse-prezidenti vəzifəsinə təyin edilib.
Azərbaycanın birinci xanımı 2004-cü ildə UNESCO-nun, 2006-cı ildə isə İSESCO-nun Xoşməramlı səfiri adlarına layiq görülüb. O, həmçinin Polşa Respublikasının “Xidmətlərə görə” Böyük Komandor Xaçı ordeni, Fransa Respublikası tərəfindən “Şərəf Legionu” ordeni, UNESCO-nun “Qızıl Motsart” medalı və digər mükafatlarla təltif olunub. 2005-ci ildə Azərbaycan xalqı arasında keçirilən sosioloji sorğuya görə, Mehriban Əliyeva “İlin qadını” adına layiq görülüb.
