Əliqulu Qüdrət oğlu Səmədov 19 avqust 1953-cü ildə Astara şəhərində anadan olub [2].
Aktyor öz haqqında belə deyib: “Uşaq vaxtlarından rəqsə böyük həvəs göstərir, tədbirlərdə, festivallarda iştirak edirdim. Amma kino aktyoru olmaq, filmlərə çəkilmək istəyini həmişə ürəyimdə gəzdirirdim. Bir dəfə xoş bir təsadüf nəticəsində “Azərbaycanfilm”də aktyor kursları açıldığını eşitdim. Həmin dərslərdə iştirak etmək məqsədilə bir dəfə kinostudiyaya gəldim və qapıda asılmış elan diqqətimi cəlb etdi”.
Əliqulu Səmədov 1970-ci ildə Bakı Rabitə Texnikumuna daxil olsa belə, 1979-cu ildə “Azərbaycanfilm” kinostudiyasının aktyor şöbəsinə qəbul olunub, həyatını kinoya bağlayıb [1].
Əliqulu Səmədov 70-ə yaxın filmin heyətində çalışıb. O, “Nizami”, “Qara gölün cəngavərləri”, “Sarıköynəyin dastanı”, “Atları yəhərləyin”, “Yol əhvalatı”, “Bağlı qapı arxasında”, “Papaq”, “Birisi gün gecəyarısı”, “Bəyin oğurlanması”, “Həm ziyarət, həm ticarət”, “Biz qayıdacağıq”, “Cavid ömrü”, “Cavad xan”, “İstanbul reysi” və başqa filmlərdə müxtəlif rollara çəkilib. [1,2].
Səmədov, həmçinin Rusiya, Ukrayna, Türkiyə və İranda istehsal olunan filmlərə dəvət alaraq müxtəlif rollara çəkilib.
Aktyor 2011-ci ildə Əməkdar artist fəxri adına layiq görülüb. Onun baş rollardan birində çəkildiyi “Alfa layihəsi” bədii filmi Ukraynanın Lenin Komsomolu Mükafatına layiq görülüb.
Əliqulu Səmədov hazırda “Azərbaycanfilm” kinostudiyasında çalışır [2].
Ədəbiyyat:
