1990-cı il yanvarın 19-dan 20-nə keçən gecə SSRİ-nin rəhbəri olan Mixail Qorbaçovun əmri ilə Bakı şəhərinə və Azərbaycanın bir neçə rayonuna sovet ordusu yeridilib. Bununla da, Sovet İttifaqının qoşun hissələri dinc əhalini kütləvi şəkildə qətlə yetirib.
Sovet ordusunun törətdiyi vəhşiliklər nəticəsində paytaxt Bakı və respublikanın digər şəhər və rayonlarında 131 nəfər öldürülüb, 744 nəfər yaralanıb və 841 nəfər həbs edilib. Sovet ordusu tərəfindən 200 ev və mənzil, 80 nəqliyyat vasitəsi məhv edilib.
Qanlı faciədən sonra, 1990-cı il yanvarın 21-də ümummilli lider Heydər Əliyev Azərbaycanın Moskvadakı daimi nümayəndəliyinə gələrək SSRİ rəhbərliyinin törətdiyi bu qanlı əməliyyata kəskin etirazını bildirib və qırğın törədənlərin hamısının layiqincə cəzalandırılmasının lazım olduğunu açıqlayıb. 29 mart 1994-cü ildə məhz Heydər Əliyevin təşəbbüsü ilə 20 Yanvar faciəsinə ilk dəfə hüquqi-siyasi qiymət verilib.
