Arif Vəliş oğlu Qubadov 20 sentyabr 1966-cı ildə Cəlilabad rayonunun Əliqasımlı kəndində anadan olub.
O, 1983-cü ildə Əliqasımlı kənd orta məktəbini bitirib. Qubadov 1984-cü ildə Cəlilabad rayon Hərbi Komissarlığı tərəfindən hərbi xidmətə çağırılıb. O, hərbi xidmətini Sovet İttifaqının müxtəlif yerlərində keçirib. 1992-ci ildə Arif Qubadov Azərbaycana gələrək Milli Orduda xidmət etməyə başlayıb [1].
18 may 1992-ci ildə Ermənistan silahlı qüvvələri Laçın rayonunu işğal etdi. Daha sonra onlar Sədərəyə doğru irəlilədilər. Arif Qubadov 1992-ci ilin iyun ayında Naxçıvanın Sədərək bölgəsində gedən qanlı döyüşlərdə iştirak edib. Onun komandir olduğu tabor düşmənin xeyli canlı qüvvəsini və döyüş texnikasını məhv edib [2].
Qubadovun dəstəsi 1993-cü ilin iyun ayında Ağdam rayonuna göndərilib. O, dəstəsi ilə birgə rayonun Əfətli, Yusifcanlı və digər kəndlərini düşməndən azad edib.
Arif Qubadov 1993-cü ilin avqustunda öz taboru ilə Füzuli rayonuna yollanıb. Arif Qubadovun rəhbərliyi altında aparılan əməliyyatlar nəticəsində rayonun Əhmədbəyli, Aşağı və Yuxan Kürdmahmudlu, Alxanlı kəndləri düşməndən təmizlənib. Bundan əlavə, o, 1994-cü ildə Tərtər və Ağdərə döyüşlərində də vuruşub [1].
4 aprel 1995-ci ildə Arif Qubadov “Azərbaycanın Milli Qəhrəmanı” adına layiq görülüb.
Qubadov 1996-cı ildə Bakı Ali Birləşmiş Komandirlər Məktəbini bitirib. 2001-2003-cü illərdə isə o, Azərbaycan Respublikası Sərhəd Qoşunları Hərbi Akademiyasında təhsil alıb. Daha sonra Arif polkovnik-leytenant rütbəsinə yüksəlib.
Arif Qubadov 26 sentyabr 2009-cu ildə Türkiyədə müalicə olunduğu Gülhanə Hərbi Tibb Akademiyasında vəfat edib, sonra isə Əliqasımlı kəndində dəfn olunub [2].
Ədəbiyyat:
