Bu gün Azərbaycanın milli valyutası – manatın dövriyyəyə buraxılmasının 34-cü ildönümüdür.
Manat 1992-ci il avqustun 15-də dövriyyəyə buraxılıb. İlk əsginaslar həmin il Fransada çap edilib. 1993-cü ilin dekabrında manat ölkə ərazisində yeganə ödəniş vasitəsi elan olunaraq Azərbaycanın rubl zonasından çıxması təmin edilib.
2006-cı il yanvarın 1-dən denominasiya həyata keçirilib və 1 yeni manat 5000 köhnə manata bərabər tutulub. Yeni manatın dizaynının müəllifi avronun dizayneri Robert Kalina olub.
2018-ci ildə 200 manatlıq, daha sonra Qarabağ mövzusunda yenilənmiş 20 manatlıq pul nişanı dövriyyəyə buraxılıb. 2023-cü ildən isə yüksək əyarlı Azərbaycan qızılından investisiya və yubiley məqsədli pul nişanlarının istehsalına başlanılıb.
2024-cü ildə yenilənmiş 1 qəpiklik, 2026-cı ilin iyulunda isə yeni dizayn və mühafizə elementləri ilə 100 manatlıq pul nişanı dövriyyəyə buraxılıb.
Hazırda Azərbaycan Mərkəzi Bankı milli pul nişanlarının mühafizə sistemlərinin müasirləşdirilməsi istiqamətində işləri davam etdirir.
