Mirzə Ağamurad oğlu Cəbiyev 22 fevral 1925-ci ildə Astaranın Hamoşam kəndində anadan olub. O, “Sovet İttifaqı Qəhrəmanı” adına layiq görülən ən gənc azərbaycanlıdır.
1943-cü ildə Mirzə Cəbiyev könüllü olaraq, orduya xidmətə gedib. O, İkinci Dünya müharibəsi zamanı Belarus, Litva, Polşa və Almaniyadakı döyüşlərdə iştirak edib.
Mirzə Cəbiyev 6 aprel 1945-ci ildə Keniqsberq ətrafındakı (hazırda Rusiya, Kalininqrad) döyüşlərdə komandir olduğu bölmə ilə 5 fortu (istehkam) zəbt edib. Cəbiyev şəxsən 8 düşməni məhv edib və 13 əsir götürərək yaralanıb. O, bu şəhərin ən hündür qalasına qələbə bayrağını sancıb.
İkinci Dünya müharibəsindən qayıtdıqdan sonra Cəbiyev müxtəlif vəzifələrdə çalışıb, uzun illər Hamoşam kəndində təsərrüfat rəhbəri işləyib. O, 1960-cı illərdə Hamoşam kəndinə texnikasız ilk avtomobil yolu salmışdır.
Mirzə Cəbiyev 10 fevral 1978-ci ildə Bakıda vəfat edib. O, Astara şəhərində dəfn olunsa da, sonradan doğmalarının xahişi ilə qəhrəmanın nəşi Hamoşam kəndinə gətirilərək, orada torpağa tapşırılıb.
