Bu gün Sovet İttifaqı Qəhrəmanı adını almış ən gənc azərbaycanlı Mirzə Cəbiyevin doğum günüdür.
Mirzə Ağamurad oğlu Cəbiyev 22 fevral 1925-ci ildə Astara rayonunun Hamoşam kəndində anadan olub.
1943-cü ildə orduda xidmətə könüllü yola düşüb. 1944-cü ildə kiçik leytenant rütbəsi alaraq 43-cü Ordu tərkibində cəbhəyə (III Belarus cəbhəsi) göndərilib. Belorusiya, Litva, Polşa uğrunda döyüşlərdə iştirak edib, Almaniyada döyüşüb.
Baş leytenant Mirzə Cəbiyev 1945-ci ilin 6 aprelində Köniqsberq şəhəri ətrafındakı döyüşlərdə komandir olduğu bölmənin önündə kanalı keçərək 5 Fortu zəbt edib və qələbə bayrağını sancıb. Bu döyüşdə o şəxsən düşməndən 13 nəfər əsir götürüb, döyüşdə yaralansa da, öz vəzifəsini qələbəyə qədər icra edib.
19 aprel 1945-ci il tarixində Sovet İttifaqı Qəhrəmanı adına layiq görülüb.
Mirzə Cəbiyev 10 fevral 1978-ci ildə Bakı şəhərində xəstəxanada müalicə alarkən vəfat edib, qış ayı olduğu üçün nəşini rayon mərkəzindən 40 kilometr aralıda yerləşən Hamoşam kəndinə aparmaq mümkün olmayıb və Astara şəhərində dəfn edilib. İllər sonra ölkə başçısı cənab İlham Əliyevin sərəncamı ilə Taxtanakəran-Toradi yolu asfaltlanarkən, doğmalarının xahişi ilə qəhrəmanın nəşi Hamoşam kəndinə gətirilərək torpağa tapşırılıb.
