Astara şəhər 5 saylı tam orta məktəbində “Ulu Öndər Heydər Əliyev Azərbaycanda peşə təhsilinin yaradıcısıdır” mövzusunda tədbir keçirilib. Bu haqda məlumatı Cenublu.az bu gün, 8 dekabr tarixində verir.
Tədbirdə Astara rayon Heydər Əliyev Mərkəzinin əməkdaşları və Astara şəhər 5 saylı tam orta məktəbinin müəllim və şagirdləri iştirak ediblər.
Çıxışlarda qeyd olunub ki, Azərbaycan Respublikasının Təhsil Nazirliyinin həyata keçirdiyi “Ümumtəhsil müəssisələrində peşə təmayüllü siniflərin təşkili layihəsi” çərçivəsində 2020-ci ildən Astara şəhər 5 saylı tam orta məktəbində peşə təmayüllü siniflər fəaliyyət göstərir. Məktəbdə peşə təmayüllü siniflərdə yeni ixtisaslar əlavə olunub. Şagirdlər dərzi köməkçisi, qənnadıçı köməkçisi, santexnik və dülgər köməkçisi ixtisasları ilə yanaşı, aqronom və informasiya texnologiyaları ixtisaslarına da yiyələnirlər.
Sonda Astara rayon Heydər Əliyev Mərkəzinin əməkdaşları peşə təmayüllü siniflərə və təcrübə sahəsinə baxış keçiriblər.
Qeyd edək ki, tədbir Astara rayon Heydər Əliyev Mərkəzinin və Astara şəhər 5 saylı tam orta məktəbinin birgə təşkilatçılığı ilə baş tutub.
