Astarada “İdman həftəsi” çərçivəsində maarifləndirmə tədbiri və rəsm sərgisi təşkil olunub. Bu haqda məlumatı Cenublu.az bu gün, 5 mart tarixində verir.
“İdman həyat və sağlamlıqdır” mövzusunda tədbir Heydər Əliyev Mərkəzində baş tutub. Burada Ziya Bünyadov adına Astara şəhər 2 saylı tam orta məktəbinin şagirdləri, müəllimləri, nümayəndələri olmaqla 31 nəfər iştirak edib.
Görüşdə Lənkəran-Astara Regional Gənclər və İdman İdarəsinin Astara rayonu üzrə sektorunun, Azərbaycan Respublikasının Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Salyan Regional İdarəsinin Astara rayonu üzrə nümayəndəliyinin, Heydər Əliyev Mərkəzinin, YAP Astara rayon Təşkilatının və rayon Dövlət Rəsm Qalereyasının bələdçisi Ülviyyə Mirzəyeva cıxış ediblər. Onlar mövzu ətrafında məlumatlar veriblər.
Daha sonra şagirdlərin sualları cavablandırılıb.
Sonda Heydər Əliyev Mərkəzinin və Dövlət Rəsm Qalereyasının birgə təşkilatçılığı ilə “Rəssamlıq” dərnəyi üzvlərinin əl işlərindən ibarət rəsm sərgisi və Mərkəzin Elektron Kitabxanada saxlanılan kitablardan təşkil olunmuş sərgi həyata keçirilib.
Bədən Tərbiyəsi və İdman Gününə həsr olunmuş tədbir Lənkəran-Astara Regional Gənclər və İdman İdarəsinin təşkilatçılığı ilə keçirilib.
