İmamverdi Kəlbi oğlu Məhəmmədhəsənov 1925-ci ildə Masallı rayonunun Qızılağac kəndində anadan olub [1].
O, 1937-ci ildə ailəsi ilə birgə Qazaxıstan SSR-in Şu rayonunun Cambul vilayətinə (indiki Türkistan vilayəti) sürgün edilib [3,4]. Məhəmmədhəsənov oradakı Janajol kəndində şəkər çuğundurunun yetişdirilməsi və yığılması ilə ixtisaslaşmış “Yeni yol” kolxozunda işləyib [4].
İmamverdi Məhəmmədhəsənov 1943-cü ildə hərbi xidmətə çağırılıb. O, Böyük Vətən müharibəsinin iştirakçısı olub. Müharibə zamanı o, atıcı alay bölməsi ilə birgə Vyana, Budapeşt, Praqa və digər şəhərləri azad edib. Bu səbəbdən “Vyananın alınmasına görə”, “Budapeştin alınmasına görə”, “Praqanın azad edilməsinə görə”, “Döyüş xidmətlərinə görə” medalları ilə təltif edilib [1,4].
O, 1946-cı ildə həyata keçirilən demobilizasiyadan sonra yenidən kolxozda işləməyə başlayıb. 1947-ci ildə İmamverdi Məhəmmədhəsənovun rəhbərliyi altında olan çuğundurbecərmə məntəqəsi 4 hektarlıq ərazidən 616 sentner, 2 hektarlıq ərazidən isə 813 sentner şəkər çuğunduru toplayıb. Buradakı fəaliyyətinə görə 23 yaşlı Məhəmmədhəsənov 1948-ci ildə “Sosialist Əməyi Qəhrəmanı” adına layiq görülüb [3].
İmamverdi Məhəmmədhəsənov 4 sentyabr 1999-cu ildə Qazaxıstanın Cambul vilayətində vəfat edib. Orada onun büstü qoyulub [1].
İmamverdi Məhəmmədhəsənovun oğlu Eyvaz Məmmədhəsənov bir müddət Qazaxıstan Azərbaycanlıları Assosiasiyası İctimai Birliyinin Almatı şəhər filialının sədri olub. O, 14 dekabr 2011-ci ildə Qazaxıstan Prezidenti Nursultan Nazarbayevin Sərəncamı ilə diaspor quruculuğu sahəsində xidmətlərinə görə “Qazaxıstanın müstəqilliyinin 20 illiyi” medalı ilə təltif edilmişdir [2].
Ədəbiyyat:
