Astarada məhəllə sakinləri yolsuzluq problemindən əziyyət çəkirlər. Bu haqda bu gün, 12 aprel tarixində Cenublu.az ATV-yə istinadən xəbər verir.
Sözügedən yol Şiyəkəran kəndinin Çəton məhəlləsində yerləşir. Bu kəndin sakinləri kimisə yola salanda “yolun açıq olsun” deyə bilmirlər. Çünki yolları tozdan, palçıqdan keçilməz vəziyyətdədir. Çarəsi isə aidiyyəti qurumların əlindədir. Şiyəkəran kəndinin Çəton məhəlləsində yaşayan sakinlər illərdir yolsuzluqdan əziyyət çəkirlər.
Yoldakı vəziyyət sürücülərə də ciddi problemlər yaradır.
“Maşın dağılır, gündə ustaya gedirik. Avtomobilin ehtiyyat hissələrini ala bilmirik. Bir dənə çınqıl tökmürlər. Nə vaxta kimi belə davam edəcək?”, - deyə sürücü İntizam Tahirov qeyd edib.
“Hal-hazırda həmin yolun təmirə ehtiyacı var. Biz Bələdiyyə sədri ilə bir yerdə bu il artıq bir dəfə həmin yolu qreyderlə hamarlamışıq, amma çox dərinliklər var orada, bəzi işlər görülməlidir. O biri ay, may ayında gəlib təmir işlərini aparacağıq”, - deyə Astara RİH başçısının Şiyəkəran kənd inzibati ərazi dairəsi üzrə nümayəndəsi Elşad Məcidov bildirib.
