Lənkəranın Separadi kəndində 150 hektarlıq sitrus bağı salınıb. Bu haqda məlumatı Cenublu.az bu gün, 22 iyun tarixində Azertag.az-a istinadən verir.
Bağa 10,7 milyon manat dəyərində investisiya yatırılıb. Burada 135 min ədəd sitrus meyvə ağacı əkilib. Əsasən, xarici sort toxumların yetişdirildiyi bağda 100 nəfərdən çox daimi, 300 nəfər isə mövsümü işlə təmin olunub.
Təsərrüfat rəhbəri Nasir Cəfərzadə bildirib ki, məhsullar, əsasən, daxili bazara çıxarılır. Bu ildən isə Rusiya bazarlarına da ixrac planlaşdırılır.
Ən müasir aqrotexniki xidmətlərin aparıldığı bağda damcı üsulu ilə müasir suvarma şəbəkəsindən, həmçinin respublikada ilk dəfə olaraq qış aylarında şaxtanın temperaturunu normal dərəcəyə salan 15 ədəd “Donqoruyan Pərvanə” (“Frost Guard”) tipli xüsusi avadanlıqdan istifadə olunur.
“Bağın ərazisi böyük olduğu üçün qışda ağacların üstünü bağlaya bilmirik. Buna görə də Türkiyədən “Donqoruyan Pərvanə”lər gətirib ərazidə quraşdırdıq ki, bu pərlər şaxtanı ərazidən uzaqlaşdırsın. Bir pər 9 hektar ərazini şaxtadan qoruyur. Əvvəllər, pərlərimiz olmayanda şaxta ağaclara ziyan vururdu, indi isə problem, demək olar ki, həllini tapıb” , – deyə təsərrüfat rəhbəri əlavə edib.
Bağdan cari ildə 3 min ton məhsulun əldə olunması gözlənilir.
