Lənkəran rayonu, Osakücə kəndində şəhid Əflatun Fərəcovun adını daşıyan küçənin asfalt örtüyü çöküb. Bu haqda məlumatı Cenublu.az bu gün, 11 iyul tarixində verir.
Belə ki, Vətən müharibəsində şəhidlik zirvəsinə ucalan şəhidimizin adını daşıyan və ailəsinin yaşadığı küçədə çuxurlar əmələ gəlib.
Qeyd edək ki, şəhid Əflatun Mircahangir oğlu Fərəcov 1999-cu ildə Lənkəran rayonunun Osakücə kəndində 9 uşaqlı ailədə anadan olub. Atası Mircahangir Fərəcov və anası Mahirə Səmədova Əflatun uşaq yaşında olarkən vəfat ediblər.
O, Vətən müharibəsində torpaqlarımızın işğaldan azad olunmasında igidlik göstərərək Talış kəndi və Suqovuşan yaşayış məntəqəsinin azad olunması uğrunda gedən döyüşlərdə iştirak edib. 15 noyabrda döyüş tapşırığını yerinə yetirən zaman şəhid olub. Bir müddət sonra tapılan nəşi 20 noyabr 2020-ci ildə Lənkəran rayonunda dəfn olunub.
