Cəlilabad sakinləri kənddaxili yolların vəziyyətindən narazıdırlar. Bu haqda bu gün, 29 mart tarixində Cenublu.az Report.az-a istinadən xəbər verir.
Söhbət Privolnoye kəndində bərbad vəziyyətə düşən yollardan gedir. Bu problem daha çox kəndin son on ildə salınan yaşayış ərazilərində özünü göstərir.
Sakinlər bildiriblər ki, Privolnoyenin yolları bərbad durumda olan hissəsində 10 ildən çoxdur yaşayış var. Amma bu müddət ərzində yollar bir dəfə də təmir edilməyib: "Yağış yağan kimi yolda palçıq dizə çıxır, hərəkət etmək mümkün olmur".
Sakinlər deyirlər ki, küçələrinə taksi belə gələ bilmir. Onlar da məcbur qalıb aldıqları yükləri əlləri ilə daşıyırlar. Həmçinin övladları məktəbə getməkdə çətinlik çəkirlər.
Onların sözlərinə görə, problemlə bağlı dəfələrlə kənd bələdiyyəsinə müraciət etsələr də, tədbir görən olmayıb. Qurumdan bildiriblər ki, sakinlər özləri vəsait toplamalıdırlar.
Problemlə bağlı Privolnoye kənd bələdiyyəsindən "Report"un yerli bürosuna bildirilib ki, kənd sakinləri bələdiyyə vergilərini ödəyən kimi yollar mərhələli şəkildə təmir olunacaq.
