Masallıda baş verən zəncirvari qəzada 4 nəfər xəsarət alıb. Bu haqda məlumatı Cenublu.az bu gün, 3 dekabr tarixində Apa.az-a istinadən verir.
Hadisə Masallı rayonunun Boradigah qəsəbəsi ərazisində qeydə alınıb. 47 yaşlı Masallı rayon Türkoba kənd sakini Şahhüseyn Adil oğlu Nurullayev idarə etdiyi "Hyundai" markalı minik avtomobili ilə hərəkətdə olarkən Masallı rayonunun 33 yaşlı Türkoba kənd sakini Ramal Məzahir oğlu Sadıqovun idarə etdiyi "Mercedes" markalı minik avtomobili və 63 yaşlı Həsən Qələm oğlu Nəzərovun idarə etdiyi "VAZ-2106" markalı minik avtomobili toqquşub.
Qəza nəticəsində "Hyundai" və "Mercedes" markalı nəqliyyat vasitələrinin sürücüləri və avtomobillərdə sərnişin qismində olanlar - Masallı rayonunun 50 yaşlı Türkoba kənd sakini Bəhruz Adil oğlu Nurullayev və Masallı rayonunun 54 yaşlı Tüklə kənd sakini Nəsib Süleyman oğlu İsmayılov müxtəlif dərəcəli bədən xəsarətləri alıblar. Yaralılar Masallı Rayon Mərkəzi Xəstəxanasına çatdırılıblar.
Faktla bağlı araşdırma aparılır.
