Masallıda xalçalar, kilimlər, isti corablar, əlcəklər və s. toxuyub əl işlərini xarici dövlətlərə belə satmağı bacaran xanımlardan ibarət bir dərnək fəaliyyət göstərir. Onları isə bir araya gətirən və bu işə həvəsləndirən gənc sahibkar Kifayət Talıbzadədir.
O, Polşada universiteti bitirdikdən sonra doğulduğu Masallı rayonuna qayıdır və burada bir çox çətinlikləri əngəlləyərək, 2019-cu ildə bir toxucu qadınla birgə “AzərCorab” toxuculuq dərnəyini yaradır:
“Sonra baxdım ki, bunu icma şəklində edə bilərəm. Xanımlar bir araya gələ bilərlər. Onlar üçün maraqlı yer ola bilər. Yəni ki, problemlərini unudub burada sosiallaşmaları üçün. Yavaş-yavaş düşündüm ki, xanımları əlavə edək və onlara treninq keçək”.
Beləliklə də iş genişlənir. İcmaya daxil olan qadınların sayı da artır.
Burada yığışan xanımların hər biri Masallının ayrı-ayrı kəndlərindən gəlir. Hətta ucqar dağ kəndlərindən gələnlər belə var. Onlar burada həm qədim el sənətimiz olan toxuculuğu yaşadır, həm gəlir qazanır, həm də sosiallaşırlar.
Artıq bir müddətdir ki, xanımlar burada kilim toxumağa da başlayıblar. Qədim, unudulmaqda olan el sənətimiz olan kilimçiliyi yaşatmaq baxımından da bu, böyük əhəmiyyət daşıyır. Burada, həmçinin Məhbubə xanım kilimçilik sənətini gənc xanımlara da öyrədir.
Xammal Türkiyədən gətirilir. Amma xanımlar gələcəkdə özləri yun əyirməyi və təbii rənglərdən istifadə etməyi düşünürlər.
Onlar sosial şəbəkə vasitəsilə müştəri taparaq əl işlərini Londona göndəriblər. Sonra tədricən Fransadan, İtaliyadan, Almaniyadan, Amerikadan və Kanadadan da alıcıları olub.
