Lənkəranda son 10 ildə aparılan tikinti, əsaslı təmir-bərpa, abadlıq, yenidənqurma işləri haqda şəhər İcra Hakimiyyəti paylaşım edib. Bu haqda məlumatı Cenublu.az bu gün, 18 iyul tarixində verir.
Belə ki, son 10 ildə Lənkəran rayonunda ümumi uzunluğu 200 km-ə yaxın 9 yol layihəsi icra edilərək istifadəyə verilib. Bunlar Şürük - Vel - Qamışovka, Lənkəran - Vilvan - Osaküçə - Türkəncil, Vilvan - Zövlə - Boladi - Liman, Liman - Nərimanabad - Balıqcılar, Aşağı Nüvədi - Kənarmeşə - Şürük, Hirkan - Daştatük - Biləsər, Lənkəran - Lerik, Hirkan - Mamusta - Siyavar, Səpnəkəran - Şürük - Sütəmurdov - Velədi - Gərmətük - Bala Şürük - Kosalar - Kərgəlan - Lüvəsər - Bəlləbur - Qurumba kəndlərarası avtomobil yollarıdır. Bundan başqa, 2012-2023-ci illərdə Lənkəran və Liman şəhərlərində 74 küçə, ümumilikdə 427.099 kv.m yol asfaltlanıb.
Bununla yanaşı, cari ildə 21 küçənin asfaltlanması da nəzərdə tutulub. Şəhərin Hənifə Abdullayev və Qala Xiyabanı küçələrindən sonra Rövşən Bayramov küçəsində də asfaltlanma işləri artıq yekunlaşmaq üzrədir.
Həmçinin, 2012-2023-cü illər ərzində rayonun 10 yaşayış məntəqəsində ümumilikdə 19 körpünün inşası tamamlanıb: Günəhirdə 7, Bəlitonda 1, Siyablida 1, Daşdatükdə 1, Biləsərdə 2, Aşağı Nüvədidə 3, Vilvanda 1, Gəgiranda 1, Tüədoda 1, Osaküçədə 1 körpü tikilib və istifadəyə verilib.
Qeyd edək ki, ümumi uzunluğu 75,2 km əhatə edən daha 2 yeni yol layihəsi investisiya proqramına daxil edilib.
