Masallıda kobud qayda pozuntularına yol verən, digər hərəkət iştirakçıları üçün təhlükə yaradan sürücülərlə bağlı yoxlama-nəzarət tədbirləri keçirilib. Bu haqda məlumatı Cenublu.az bu gün, 21 iyun tarixində ARB Cenub-a istinadən verir.
Masallı rayon polis şöbəsinin DYP bölməsinin əməkdaşları tərəfindən hərəkətin intensiv olduğu küçə və prospektlərdə təşkil olunan profilaktik tədbirlər zamanı avtomobillərin texniki vəziyyətinə qanunsuz müdaxilə olaraq əlavə avadanlıqlar quraşdıran, ötmə və manevr qaydalarını pozan, sürücülük vəsiqəsi olmadan sükan arxasına keçən, yükdaşıma və sərnişindaşıma qaydalarını pozan sürücülər aşkarlanıb.
Yoxlamalar və nəzarət tədbirləri zamanı, həmçinin digər nəqliyyat vasitələrinin hərəkətinə maneə yaradan və müvafiq sənədləri, qeydiyyat nişanı olmadan idarə edilən motosikletlər, atmosferə ixrac etdiyi qazların tərkibindəki zərərli maddələrin normadan çox olduğu nəqliyyat vasitələri də müəyyən edilib. Bundan əlavə, sərnişinlərin təhlükəsizliyi və mənzilbaşına rahat çatmasını təmin etmək məqsədilə taksi və marşrutlarda aşkarlanan neqativ hallarla bağlı da qanunvericilik tələblərinə uyğun tədbirlər görülüb.
“Keçirilən nəzarət və profilaktiki tədbirlər nəticəsində müxtəlif qayda pozuntularına yol verən sürücülər aşkarlanıblar. Aşkarlanan hallarla bağlı inzibati xəta haqqında protokollar tərtib edilib. Bu kimi profilaktiki tədbirlərin keçirilməsində məqsəd yol hərəkəti təhlükəsizliyinin təmini və baş verə biləcək qəzaların qarşısının alınmasıdır”, - deyə DİN-in Mətbuat xidmətinin Lənkəran regional qrupunun baş inspektoru, polis kapitanı Məhəmməd Rzayev bildirib.
