Cəlilabad rayonunda xırdabuynuzlu heyvanların tələf olması ilə bağlı narahatlıq doğuran hadisə qeydə alınıb.
Cenublu.az xəbər verir ki, hadisə rayon sakini Daşqın Hüseynovun təsərrüfatında baş verib.
Təsərrüfat sahibinin sözlərinə görə, o, aprel ayında heyvanlarının dabaq xəstəliyinə qarşı peyvənd olunması üçün rayon baytarlıq xidmətinə müraciət edib. Bundan sonra baytar həkimlər tərəfindən təsərrüfatdakı bütün xırdabuynuzlu heyvanlar vaksinasiya olunub. Bir müddət sonra heyvanların vaksin vurulan nahiyələrində iltihabi proseslər müşahidə edilməyə başlanıb. Nəticədə təsərrüfatdakı 4 baş xırdabuynuzlu heyvan tələf olub.
Daşqın Hüseynov bildirib ki, məsələ ilə bağlı Azərbaycan Qida Təhlükəsizliyi Agentliyinə (AQTA) müraciət edib. Agentliyin əməkdaşları təsərrüfatda baxış keçirərək laborator müayinələr üçün nümunələr götürüblər.
Fermerin iddiasına görə, aparılan araşdırmalar zamanı heyvanlara vurulan vaksin vasitəsilə infeksiyanın keçdiyi müəyyən edilib. O bildirib ki, hazırda təsərrüfatdakı daha 10 baş heyvanda iltihabi proses davam edir və onların da tələf olmaq təhlükəsi var.
Hadisə ilə bağlı hüquq-mühafizə orqanlarına məlumat verildiyi, araşdırmaların davam etdiyi bildirilir.
