SOCAR “Azəriqaz” İstehsalat Birliyinin Masallı rayonunda “Açıq mikrofon” aksiyası baş tutub. Bu haqda məlumatı Cenublu.az bu gün, 18 mart tarixində verib.
Aksiyada ümumilikdə 20-yə yaxın müraciət ünvanlanıb ki, bunların da əksəriyyəti bəzi kəndlərin qazlaşmasından ibarət olub.
Nəzəroba, Rüdəkənar, Xəlifələr, Yelağac, Əmirtürbə və Yeni Zuvand kənd sakinləri kəndlərinin mavi yanacaqla təchiz olunmalarını istədiklərini bildiriblər.
Bundan başqa, aksiyada fərdi yaşayış evinin qazlaşdırılması istəyi də yer alıb. Bu müraciətlə çıxış edən Əbülfət Cəbrayılova bildirilib ki, SOCAR “Azəriqaz”ın daxili resursları hesabına çəkilən küçə xətlərinə qoşulma prosesi sakinlərin vəsaiti hesabına, xüsusi lisenziyası olan podratçı şirkətlər tərəfindən həyata keçirilməlidir.
Mənzillərin və ya fərdi yaşayış evlərinin qazlaşdırılması istisna hal kimi şəhid ailələrinə və qazilərə şamil edilir. Aksiyada, həmçinin debitor borcun hissə-hissə ödənilməsinə şəraitin yaradılması və qaz xəttinin yerinin dəyişdirilməsi ilə bağlı müraciətlər də ünvanlanıb. SOCAR "Azəriqaz" İB-nin Lənkəran RQİİ-nin rəhbər şəxsləri səslənən problem və təkliflərin aidiyyəti üzrə yönləndiriləcəyini qeyd ediblər.
