Astara rayonunun Şahağacı kəndində intensivləşən torpaq sürüşməsi 50-yə yaxın ev üçün təhlükəli vəziyyət yaradıb. Bu haqda məlumatı Cenublu.az bu gün, 17 noyabr tarixində Apa.az-a istinadən verir.
Belə ki, sel və daşqınlar zamanı ərazidən keçən Pensərçay torpaq qatını yuduğundan çay sahilinin evlərlə məsafəsi azalıb. Pensərçay sağ və sol sahillərinə doğru 20-25 metr genişlənib. Sakinlər deyirlər ki, yol daraldığından iritonnajlı yük maşınları yoldan keçə bilmir. Əraziyə çağırılan təcili yardım maşınları isə uzaqda saxlamağa məcbur olur.
Torpaq sürüşməsi vətəndaşların həyətyanı sahələrindəki tikililərə, meyvə bağlarına da ciddi ziyan vurub. Sürüşmə 20 metr enliyində, 50 metr uzunluğunda torpaq qatını uçuraraq kənd sakinləri Səfail İbadov, Möhsün Möhsümov və digərlərinin həyətyanı sahələrindəki hamam-ayaqyolunu, 50-yə yaxın sitrus, eləcə də digər meyvə ağaclarını aparıb.
İndi sakinləri narahat edən odur ki, əgər çay kənarına bənd vurulmasa, növbəti seldə daha böyük fəsadlar yarana bilər və 50-yə yaxın ailə yaşadıqları evləri tərk etmək məcburiyyətində qalacaq.
Məsələ ilə bağlı Şahağacı kənd bələdiyyəsinin sədri Samir Mayilov münasibət bildirib: “7 evə gedən yol tamamilə yuyulub. Gediş-gəliş üçün məhdudiyyətlər yaranıb. Baş verən təbii fəlakətlə bağlı dərhal rayon İcra Hakimiyyətində komissiya yaradılıb. Yaradılan komissiya ilə birgə həmin yerlərə baxış keçirilib. Fövqəladə Hallar Nazirliyinin (FHN) və Azərbaycan Dövlət Su Ehtiyatları Agentliyinin müvafiq qurumlarına müraciət olunub. Onların əməkdaşları gəlib yerlərdə baxış keçirib və aktlaşdırıblar. Ərazidə bəndləşmə işləri ilə bağlı müəyyən tapşırıqların verilməsi müzakirə olunub”.
Qeyd edək ki, ilin sonuna kimi ərazidə tədbirlərin görülməsi nəzərdə tutulub.
