Astara şəhərinin mərkəzindən təxminən 30 kilometr məsafədə yerləşən Vənəşikəş kəndində qaz xətti çəkilir. Bu haqda məlumatı Cenublu.az bu gün, 10 fevral tarixində AzTV Xəbər-ə istinadən verir.
Qaz xəttinin çəkilməsi ümumilikdə 7 min metr uzunluqda nəzərdə tutulur. İşlər artıq 1 həftədir ki, başlanıb və mart ayında başa çatdırılması planlaşdırılır.
Layihə rəhbəri Elhad Məmmədov qeyd edib: “Hal-hazırda ərazidə 12 nəfər işçi qüvvəmiz var. Ərazi dağ zonasında yerləşir, relyefi çətindir. Amma biz texnikaları cəlb eləmişik. Mümkün olan qədər işimiz sürətli gedir”.
Vənəşikəş kəndində 42 abonent olmaqla ümumilikdə 350 nəfər sakin mavi yanacaqla təmin olunacaq. Onlar indiyə qədər yanacaq kimi odundan istifadə ediblər. Bunun üçün sakinlər kəndin ətrafındakı meşənin ağaclarını kəsməyə məcbur olublar.
Qeyd edək ki, daha sonra Burzubənd və Noyabund kəndlərinin qazlaşmasına başlanılacaq. 2 kənddə ümumilkdə 350 abonent var. Həmçinin cari il Sipiyəpart, Taxtakəran, Qandalaş, Lobir və Vaqadi kəndlərinin də qazlaşdırılması nəzərdə tutulur.
