Astara rayonunun Şuvi kəndində torpaq sürüşməsi olub. Bu haqda məlumatı Cenublu.az bu gün, 30 yanvar tarixində APA-ya istinadən verir.
Bu ay havaların yağıntılı keçməsi ilə əlaqədar torpaq sürüşməsi təxminən 150-200 metr uzunluğa və 20-30 metr aşağıya yayılıb.
Fərdi yaşayış evlərinin bünövrəsi yaxınlığında torpaqların çökməsi və sürüşməsi həmin evlər üçün təhlükəli vəziyyət yaradıb. Bir neçə evin divarlarında çatlar əmələ gəlib. Həmçinin sitrus bağlarına da ziyan dəyib.
Sürüşmə ilə bağlı əraziyə Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin mütəxəssisləri və fərdi yaşayış evlərinə Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyi tərəfindən baxış keçirilib, müvafiq aktlar tərtib olunub.
Qeyd edək ki, əvvəllər bu ərazilərdə köhnə evlər olsa da, heç bir sürüşmə baş verməyib. Sürüşmə daha çox son iki ildə aktivləşib.
[URIS id=52885]
