Astaranın Miki kəndi ərazisində beş kəndi rayon mərkəzi ilə birləşdirən körpü təhlükəli vəziyyət yaradıb. Bu haqda məlumatı Cenublu.az bu gün, 19 dekabr tarixində ATV News-a istinadən verir.
İntensiv yağıntılardan sonra körpünün bir istiqamət boyunca alt hissəsində torpaq qatı yuyulub. Sakinlərin sözlərinə görə, bir istiqamətdə körpünün uçması səbəbindən yol daralıb. Nəticədə ağır yüklərin kəndə daşınması mümkünsüz olub.
Məsələ ilə bağlı Siyakü kənd bələdiyyəsindən qeyd olunub ki, artıq əraziyə texnika cəlb olunub və körpüdə müəyyən təmir işləri həyata keçirilib.
“İstinad divarları öz yerində qalsa da, həmin körpü bərbad vəziyyətə düşmüşdü. Körpü idarəmiz tərəfindən çınqılla təmin olundu. Gələcəkdə həmin körpünün tikintisi nəzərdə tutulub”, – deyə Siyakü kənd bələdiyyəsinin sədri, Ramin Dədəyev bildirib.
Qeyd edək ki, körpü 5 kəndin rayon mərkəzinə çıxışını təmin edən yeganə yoldur. Bu yoldan ətraf 5 kəndin 1500-dək sakini istifadə edir.
