Astara rayonunda gecə vaxtı sürət yarışı keçirməklə yol hərəkəti qaydalarını kobud şəkildə və dəfələrlə pozan sürücülər tutulublar. Bu haqda məlumatı Cenublu.az bu gün, 4 sentyabr tarixində verir.
DİN-in verdiyi məlumata görə, gecə saatlarında şəhər ərazisində özü və digər sürücülər üçün ciddi təhlükə yaradan, yol hərəkəti qaydalarını kobud şəkildə pozan və "VAZ" markalı avtomobillərlə sürət yarışı keçirən sürücülər saxlanılıblar.
Tutulanların Astara rayon sakinləri Vüqar Rüstəmov və Amin Heydərov olduqları müəyyən edilib. Onlardan birinin nəqliyyat vasitəsini idarə etmək hüququnun olmadığı, digərinin isə avtomobili etibarnamə olmadan idarə etdiyi məlum olub. Barələrində inzibati qaydada protokollar tərtib olunaraq hüquqi qiymət verilməsi üçün Astara Rayon Məhkəməsinə göndərilib.
Məhkəmənin qərarı ilə avtoxuliqanlar 15 gün müddətində inzibati qaydada həbs ediliblər.
