Astara rayonunun Şiyəkəran kəndində yeni salınan piyada körpüsü çöküb. Bu haqda məlumatı Cenublu.az bu gün, 16 oktyabr tarixində Apa.az-a istinadən verir.
Belə ki, illərdir ki, qəzalı vəziyyətdə olan körpü bir müddət öncə tamamilə sökülüb və yerində yeni piyada körpüsü salınıb. Lakin yeni körpünün ömrü cəmi iki-üç gün çəkib.
Sakinlərin istifadə edə biləcəyi alternativ yol isə təqribən 6 km məsafədə yerləşir. Bu yoldan da yalnız piyadalar və kiçikhəcmli maşınlar istifadə edə bilər. Həmin körpü də qəzalı vəziyyətdə olduğu üçün fermerlər əkdikləri sitrus meyvələrini bazara çıxarıb sata bilmirlər.
Şiyəkəran kənd inzibati dairəsi üzrə nümayəndəsi Elşad Məcidov bildirib ki, iritonnajlı maşınlar üçün nə davamlı körpü var, nə də əlverişli yol:
“Hazırda vətəndaşlar öz məhsullarını bazara ancaq alternativ yoldan istifadə etməklə minik maşınları ilə çıxara bilərlər. Piyada yolu salınana kimi şagirdlər də alternativ yollardan istifadə edərək məktəbə gedə bilirlər”.
