Lənkəran şəhər İcra Hakimiyyətinin başçısı Taleh Qaraşov Şiləvar kənd inzibati ərazi dairəsinin sakinləri ilə növbəti səyyar görüş-qəbulunu keçirib. Bu haqda məlumatı Cenublu.az bu gün, 22 fevral tarixində verir.
Səyyar qəbulda İcra Hakimiyyəti aparatının məsul şəxsləri, hüquq-mühafizə orqanlarının rəhbərləri, idarə və müəssisələrin nümayəndələri də iştirak ediblər.
Taleh Qaraşov ötən qəyyar qəbulda qaldırılan məsələlərin icra vəziyyəti barədə yerli insanları məlumatlandırıb. Bildirilib ki, İcra Hakimiyyətinin səlahiyyətləri çərçivəsində ədalətli şəkildə qaldırılan bütün məsələlər öz həllini tapıb, digər məsələlər barədə aidiyyəti üzrə qurumlara müraciətlər ünvanlanıb və bu barədə vətəndaşlara məlumat verilib. ŞİH başçısı qeyd edib ki, qaldırılan hər bir məsələyə həssas yanaşılır və hər biri şəxsən onun nəzarətindədir.
Digah və Şiləvar kəndləri sakinlərinin şəxsi və ümumi problemlərini dinləyən Taleh Qaraşov bir sıra məsələlərin həlli ilə bağlı yerində göstərişlərini verib, əlavə araşdırma tələb edən məsələlər barədə isə qanunvericiliyin tələblərinə uyğun müddətdə vətəndaşlara nəticə barədə məlumatların verilməsini aidiyyəti vəzifəli şəxslərə tapşırıb.
