Lənkəran-Astara Regional Təhsil İdarəsi Vətən müharibəsi qazisi, Şuşaya ilk daxil olan kəşfiyyatçılardan biri - Mirəhməd Ağayevi məktəb direktoru təyin edib. Bu haqda məlumatı Cenublu.az bu gün, 26 sentyabr tarixində verir.
Belə ki, Mirəhməd müəllim Lerik rayonunun Hamarat kənd tam orta məktəbinə təyinat alıb.
Qeyd edək ki, Mirəhməd Ağayev Lerik rayonunun Dızdipok kəndində ziyalı ailəsində anadan olub. O, Hamarat kənd orta məktəbini bitirdikdən sonra Lənkəran Dövlət Universitetində Riyaziyyat və informatika ixtisası üzrə ali təhsil alıb. Naxçıvanda Milli ordu sıralarında xidmət etdikdən sonra Lerik rayonunun B.Dövlətov adına Vılık kənd ümumi orta məktəbində, Hamarat kənd tam orta məktəbində, Çayrud kənd M.Ziyadov adına ümumi orta məktəbində riyaziyyat və informatika müəllimi kimi çalışıb.
O, Vətən müharibəsi zamanı kəşfiyyatçı kimi Şuşaya ilk daxil olan igidlərimizin sırasında olub. İlham Əliyevin Sərəncamları ilə bir sıra orden və medallarla təltif olunub.
