Yetkinlik yaşına çatmamış qızı qaçırmaqda təqsirləndirilən şəxs məhkəmənin qərarı ilə azadlıqdan məhrum edilib. Bu haqda məlumatı Cenublu.az bu gün, 24 fevral tarixində Lent.az-a istinadən verir.
Belə ki, Cəlilabadda 17 yaşlı qızın itməsi barədə ailə üzvləri polisə müraciət ediblər. Aparılan istintaq araşdırmaları nəticəsində qızı qonşuların – 30 yaşlı A.M. və onun 29 yaşlı dayısı oğlu H.B.-nin qaçırdıqları üzə çıxıb. Onlar şübhəli bilinərək həbs ediliblər.
İlkin araşdırmalar zamanı məlum olub ki, A.M. həmin qızı sevdiyi və evlənmək istədiyi üçün qaçırıb.
Təqsirləndirilən şəxslərə qarşı Cinayət Məcəlləsinin 144.3-cü maddəsi ilə cinayət işi açılıb. Məhkəmə istintaqına Lənkəran Ağır Cinayətlər Məhkəməsində hakim Oruc Cəlilovun sədrliyi ilə baxılıb.
Məhkəmənin yekun qərarı ilə A.M. 10 il 6 ay müddətinə azadlıqdan məhrum edilib. Ona bu işdə kömək edən dayısı oğluna isə 10 il həbs cəzası verilib. Hər ikisi cəzasını ciddi rejimli cəzaçəkmə müəssisəsində çəkəcək.
