Vətən müharibəsində şəhid olan polkovnik-leytenant Nail Orucovun həyat yoldaşı və oğlu tələbə adı qazanıblar. Bu haqda məlumatı Cenublu.az bu gün, 31 avqust tarixində verir.
Şəhidin oğlu Əlihəsən Orucov Azərbaycan Memarlıq və İnşaat Universitetinin Sənaye mühəndisliyi ixtisasına, həyat yoldaşı Nigar Ağamalıyeva isə Bakı Dövlət Universitetinin Filologiya fakültəsinə qəbul olublar.
Qeyd edək ki, Nail Orucov 11 iyun 1978-ci ildə Astara rayonunun Məsçitməhəllə kəndində anadan olub. 1995-ci ildən Azərbaycan Silahlı Qüvvələrinin sıralarında xidmət edən Nail Orucov 2016-ci ildə ehtiyata buraxılıb. Polkovnik-leytenant Nail Orucov 27 sentyabr 2020-ci ildə başlayan Vətən müharibəsinə qatılıb. Cəbrayılın, Hadrut qəsəbəsinin, Füzulinin və Qubadlının azadlığı uğrunda gedən döyüşlərdə savaşıb, 31 oktyabr Qubadlının azad edilməsi zamanı şəhid olub.
Ölümündən sonra "Vətən uğrunda", "Cəbrayılın azad olunmasına görə", "Qubadlının azad olunmasına görə" medalları və "Azərbaycan Bayrağı" ordeni ilə təltif olunub.
