Millət vəkili Rüfət Quliyev Lənkəranda Ərazi Vergilər Baş İdarəsinin sabiq rəisi barədə gileylənib. Bu haqda məlumatı Cenublu.az bu gün, 13 mart tarixində Qafqazinfo-ya istinadən verir.
“Beş-altı il bundan əvvəl Namiq Bağırov Lənkəranda Ərazi Vergilər Baş İdarəsinin rəisi olub. O vaxt Lənkəranda mikro və kiçik sahibkarlar bunun əlindən qan ağlayırdılar”. Bu sözləri o, Milli Məclisin İqtisadi siyasət, sənaye və sahibkarlıq komitəsinin iclasında "Dövlət vergi orqanlarında xidmət haqqında Əsasnamə”yə təklif edilən dəyişikliklərin müzakirəsi zamanı deyib.
Deputat bildirib ki, həmin zaman vergi orqanlarına müraciət edib:
“Yoxlama gəldi və 3 gün əvəzinə bir gün qaldılar. Gedəndən sonra dedilər ki, həqiqətən, bu insan kifayət qədər qanun pozuntuları edib. Hətta mənə dedilər ki, ola bilər ki, məsuliyyətə cəlb olunsun. Bu, həmin orqandan çıxıb, bu gün Lənkəranda neft bazasının müdiri işləyir. Keçmişdə bu səhvləri buraxan adamı həmin yerə müdir qoyublar. Az qala barəsində cinayət işi qaldırılan, işdən çıxarılan rəis necə olur ki, həmin rayonda neft bazasının müdiri olur? Bununla bağlı plenar iclasda da çıxış edəcəyəm”.
Qeyd edək ki, Rüfət Quliyev 73 saylı Lənkəran şəhər seçki dairəsindən deputat seçilib.
