Masallı Tarix-Diyarşünaslıq Muzeyində “Xocalı soyqırımı həqiqətləri” adlı tarix dərsi keçirilib. Bu haqda məlumatı Cenublu.az bu gün, 22 fevral tarixində verir.
Tarix dərsi zamanı şagirdlərə 1992-ci il fevral ayının 25-dən 26-na keçən gecə Ermənistan hərbi birləşmələrinin Xocalı şəhərində törətdikləri Xocalı soyqırımı aktının Azərbaycan tarixinin ən dəhşətli səhifələrindən biri olduğu bildirilib. Qeyd edilib ki, Ermənistan silahlı qüvvələri beynəlxalq hüququn norma və prinsiplərini kobudcasına pozaraq keçmiş Sovet Ordusunun Xankəndidə yerləşən 366-cı alayının iştirakı ilə Xocalı şəhərinə hücum edərək dinc əhaliyə misli görünməmiş qəddarlıqla divan tutub.
Sonra şagirdlər Xocalı soyqırımına aid fotosərgi ilə tanış olublar. Yekunda şagirdlər muzeyə ekskursiya ediblər.
