Masallı rayon Mərkəzi Kitabxanasında görkəmli Azərbaycan bəstəkarı Süleyman Ələsgərovun anadan olmasının 100 illiyi ilə əlaqədar tədbir keçirilib. Bu haqda məlumatı Cenublu.az bu gün, 16 aprel tarixində verir.
Tədbirdə çıxış edənlər Süleyman Ələsgərovun həyat və yaradıcılığı haqqında məlumat verərək onun musiqi və mədəniyyət beşiyi olan Şuşa şəhərində anadan olduğunu diqqətə çatdırıb.
Qeyd olunub ki, ilk təhsilini Şuşada, Musiqi texnikumunun tar sinfində alan Süleyman Ələsgərov ali təhsilini Bakı şəhərində davam etdirib. Konservatoriyanın Bəstəkarlıq fakültəsini bitirən gənc bəstəkar qısa müddət ərzində musiqi ictimaiyyətində tanınmağa başlayıb.
Sonra görkəmli bəstəkarın əsərlərindən söz açılıb. Vurğulanıb ki, Süleyman Ələsgərovun yaradıcılığında operetta janrı geniş yer tutub. Onun yaradıcılıq uğurlarında 1942-ci ildə bəstələdiyi ”Gözlə məni” mahnısı böyük rol oynayıb. Tükənməz yaradıcılıq imkanlarına malik olmuş Süleyman Ələsgərov 11 operettanın, musiqili komediyaların, operaların, simfonik muğamların, romansların və nəğmələrin müəllifi olub. Süleyman Ələsgərovun yaradıcılığında geniş yer tutan çoxlu sayda hərbi marşlar Vətən harayı, düşmənə qısas çağırışı olub. Süleyman Ələsgərov səmərəli yaradıcılığı ilə yanaşı, bir çox müxtəlif vəzifələrdə çalışıb.
