Masallı rayonunun Viləş kəndi ərazisində cənub zonasında ilk olaraq sahibsiz itlər üçün sığınacaq yaradılıb. Bu haqda məlumatı Cenublu.az bu gün, 22 sentyabr tarixində verir.
Masallı rayon İcra Hakimiyyətindən saytımıza verilən məlumata görə, sığınacaq RİH-nin tapşırığı əsasında Mənzil Kommunal Təsərrüfatı İstehsalat Birliyi (MKTİB) tərəfindən inşa olunub.
0,16 ha ərazini əhatə edən sığınacaq qalın məftillərlə hasarlanıb. Burada hələlik 20-yə yaxın sahibsiz it yerləşdirilib.
Daha ətraflı məlumat üçün MKTİB ilə əlaqə saxladıq. Qurumun rəhbəri Məhərrəm müəllim bildirdi ki, sığınacağın maliyyələşməsi tamamilə MKTİB-nin üzərindədir. “İtlərin tutulması, zərərsizləşdirilməsi, qidalanması ilə biz məşğul oluruq. Onlara, həmçinin nəzarətçi də təyin olunub. İkicanlı heyvanlara xüsusi qulluq edirik”.
Həmçinin o bildirib ki, itlərin yenicə doğulmuş balaları bəzən sakinlərə hədiyyə verilir. “Lakin həmin insanların ünvanlarını mütləq götürürük ki, daha sonra gedib maraqlanaq, sahibi itə necə baxır”.
Qeyd edək ki, gələcəkdə sığınacağın daha da genişləndirilməsi və daş hasarla hörülməsi nəzərdə tutulur.
