Masallı rayonunun Banbaşı kəndində Masallı rayonunun Köçəkli kəndinin I Qarabağ müharibəsi şəhidi Rəhimov Sərhəddin Yadulla oğlunun bacısı, 5 uşaq anası Rəhimova Fərqanə Yadulla qızı üçün fərdi yaşayış evi tikilərək istifadəyə verilib.
Mərasimdə Masallı Rayon İcra Hakimiyyətinin başçısı Araz Əhmədov, Milli Məclisin deputatları Məşhur Məmmədov, Anar İsgəndərov, təşkilatçılar, dəstək olanlar, şəhid ailələri, qohumlar və qonşular iştirak ediblər.
Qeyd edək ki, fərdi yaşayış evi Masallı Rayon İcra Hakimiyyətinin başçısı Araz Əhmədovun təşəbbüsü, “Viləş" Uşaq Bağçasının direktoru Şəfa Allahverdiyevanın təşkilatçılığı, sahibkarların, xaricdə yaşayan xeyirxah Azərbaycanlıların və yerli xeyriyyəçilərin maddi dəstəyi ilə tikilərək təhvil verilib.
Açılış mərasimdə təşkilatçı, “Viləş" Uşaq Bağçasının direktoru Şəfa Allahverdiyeva bildirib ki, İlham Əliyevin doğum günü ərəfəsində “Sabahın 5 əsgərinə ev olaq" devizi altında həyata keçirilən lahiyəyə əsasən, tikilən evin ümumi sahəsi 80 kv.metr olmaqla, 3 otaq, 1 mətbəx və 1 sanitar qovşaqdan ibarətdir. Mənzil tam təmirli olmaqla yanaşı, bütün kommunal xidmətlər, mebel dəsti və digər məişət əşyaları ilə təmin olunub.
Sonda evin açılışını bildirən rəmzi lent kəsilib və çay süfrəsi arxasında qonaqlar ailənin sevincinə şərik olublar.
