Masallı rayonunun Şərəfə kəndində “Kəndlərdə yaşayan qızların təhsilə və peşə seçiminə təşviqi” layihəsi çərçivəsində təlim baş tutub. Bu haqda məlumatı Cenublu.az bu gün, 7 oktyabr tarixində verir.
26 məktəbli qızın iştirakı ilə keçirilən layihə üzrə təlimçi Rafət Şirəliyev iştirakçılara təhsilin formaları, təhsil və peşə sahələrində seçimin düzgün təhlili mövzusunda məlumat verib və fərdi tapşırıqlar əsasında potensial təhsil alan gənclərin üstünlüklərinin müəyyənləşdirilməsi istiqamətində qrup işləri həyata keçirib.
Qeyd edək ki, növbəti silsilə təlimlərin 2023-cü ilin oktyabr ayının sonunadək Masallı rayonunun daha 4 kəndində – Köhnə Alvadı, Qəriblər, Yeyənkənd və Qızılağacda həyata keçirilməsi nəzərdə tutulub. Təlim proqramı yekunlaşdıqdan sonra qeyd olunan 5 kənddən müəyyən edilən 20 nəfər qız üçün Masallı rayonunda fəaliyyət göstərən müxtəlif qurumlarda və peşə subyektlərində təcrübə mübadiləsi təşkil ediləcək.
Layihənin məqsədi Masallı rayonunun kəndlərində yaşayan qızların təhsilə və peşələrə marağının artırılması və onlara rayonun sosial-iqtisadi potensialını tanıtmaqdır.
Tədbir Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi, "Masallıda Qadınların Sosial İnkişafına Dəstək” İctimai Birliyinin icrası ilə təşkil olunub.
