Masallı Gənclər Evinin əməkdaşları “Qəhrəmanlarımızı Tanıdaq” layihəsi çərçivəsində qazi Zəfər İbrahimlini ziyarət ediblər. Bu haqda bu gün, 24 sentyabr tarixində Cenublu.az Masallı RİH-yə istinadən xəbər verir.
Görüş zamanı Vətən müharibəsi qazisi İbrahimli Zəfər Cəfər oğlu keçdiyi şərəfli döyüş yolundan söhbət açıb. Qəhrəmanımız müharibədə qələbə qazanmağının sevincini, döyüş xatirələrini qonaqlarla bölüşüb.
İbrahim Cəfərli 6 iyul 2000-ci ildə Masallı rayonunun Mollahəsənli kəndində anadan olub. O, 2019-2020-ci illərdə çağırışçı kimi hərbi xidmətə yollanıb. Vətən müharibəsində Ağdam, Füzuli, Cəbrayıl və Zəngilan rayonlarının azadlığı uğrunda gedən döyüşlərdə fəal iştirak edib.
Qazimiz Zəngilan rayonunun azadlığı uğrunda gedən döyüşdə ağır yaralanıb.
Prezident İlham Əliyevin Sərəncamına əsasən, Zəfər Cəfər oğlu İbrahimli “Füzulinin azad olunmasına görə”, “Ağdamın azad olunmasına görə”, “Cəbrayılın azad olunmasına görə”, “Zəngilanın azad olunmasına görə”, “Vətən Müharibəsi İştirakçısı”, “Döyüşdə Fərqlənməyə Görə” və “Tərəqqi” medalları ilə təltif olunub.
