Lerikdə Lənkəran Dövlət Dram Teatrının ərsəyə gətirdiyi “Haqqın 44 günü” tamaşası nümayiş etdirilib. Bu haqda bu gün, 26 noyabr tarixində Cenublu.az Azərtac-a istinadən xəbər verir.
Tamaşa Lerik Rayon Mədəniyyət Mərkəzində oynanılıb. Səhnədən əvvəl torpaqlarımızın müdafiəsi uğrunda canından keçmiş şəhidlərimizin əziz xatirəsi bir dəqiqəlik sükutla yad olunub.
Lənkəran teatrının direktoru Tofiq Heydərov çıxış edərək yaradıcı kollektivin "Şuşa İli" ilə bağlı bir sıra layihələr üzərində çalışdığını bildirib və təqdim olunan “Haqqın 44 günü” tamaşasının bu layihə çərçivəsində hazırlandığını, bu vaxta kimi tamaşanın Salyan, Neftçala, Cəlilabad, Biləsuvar və Masallı rayonlarında, habelə hərbi hissələrdə oynanıldığını qeyd edib.
Tamaşaçılar tərəfindən alqışlarla qarşılanan səhnə əsərinin müəllifi və quruluşçu rejissoru Anar Babalı, quruluşçu rəssamı Adil Əsədli, musiqi tərtibatçısı Fərahim Fərəcovdur.
Rollarda teatrın gənc aktyor və aktrisalarından Gülər Kərimli, Səyyad Əliyev, Emil Tağı, Şəbnəm Hüseynova, Aysel Cahangirova, Amil İbrahimli, Teymur Hacızadə və Günel Abbaszadə çıxış ediblər.
