Lənkəran Dövlət Universitetində “Polşa memarlığının şah əsərləri” fotosərgisinin açılışı baş tutub. Bu haqda məlumatı Cenublu.az bu gün, 11 mart tarixində verir.
Fotosərgi ilə tanış olmaq üçün Polşa Respublikasının Azərbaycandakı səfiri Rafal Poborski Lənkəran Dövlət Universitetində olub. Onu LDU-nun rektoru, professor Natiq İbrahimov qəbul edib. Çay süfrəsi arxasında keçən söhbət zamanı LDU ilə Polşa universitetləri arasında əlaqələrin daha da möhkəmləndirilməsi istiqamətləri müzakirə edilib.
Cənab Rafal Poborski LDU-nun Böyük akt zalında keçirilən tədbirdə universitetin professor-müəllim-tələbə heyəti qarşısında çıxış edərək Azərbaycan-Polşa əlaqələrindən, onların inkişaf perspektivlərindən, LDU ilə Polşa universitetləri arasında əlaqələrin gücləndirilməsindən söz açıb.
Rafal Poborski Polşa Respublikasının Azərbaycandakı səfirliyi və Lənkəran Dövlət Universitetinin birgə təşkilatçılığı ilə həyata keçirilən “Polşa memarlığının şah əsərləri” fotosərgisinin açılışını edib.
Tədbir iştirakçıları fotosərgidə nümayiş edilən əsərlərlə maraqla tanış olublar.
