Lənkəran rayonu Diryan kənd məktəbinin informatika müəllimi Vurğun Axunzadə öz peşəsi və uşaqlarda kompüterə olan maraq haqda danışıb.
Vurğun Axundzadə 1996-cı ildə Lənkəran rayonun Gəgiran kəndində anadan olub. İlk təhsilini Gəgiran kənd tam orta məktəbində alıb. 2013-cü ildə Astara Pedaqoji Kollecinin İnformatika müəllimliyi ixtisasına qəbul olub. 2018-ci ildə MİQ imtahanına qatılaraq test mərhələsində 45 bal toplayıb. Seçim mərhələsində Diryan tam orta məktəbinə qəbul olub.
Vurğun müəllim bildirir ki, məktəb infrastrukturu çox da yaxşı deyil, müasir avadanlıqlarla tam təmin olunmayıb:
“Birinci il getdiyimdə uşaqların biraz kompüterə maraqları az idi. İndiki uşaqların əksəriyyəti, demək olar ki, çoxu telefona maraq göstərir, ona görə də bu, bir az da mənim işimi rahatlaşdırır. Çünki telefon da kompüterin, demək olar ki, bir hissəsi, bir növüdür. Müəyyən şeylər düz gəldiyinə görə parametrlərində uyğunluq var. Deməli bu, mənim üçün də yaxşıdır ki, uşaqlar daha çox kompüteri mənimsəsinlər. Mən burada böyümüşəm, burada boya-başa çatmışam, elə bu məktəbdə də qalacağam. Biliklərimi sevə-sevə uşaqlara öyrətməyə hazıram”.
