Lənkəran şəhər Heydər Əliyev Mərkəzində “Yaşıl dünya naminə həmrəylik ili” çərçivəsində “Azərbaycanda ətraf mühitin sağlamlaşdırılması istiqamətində ümummilli lider Heydər Əliyevin rolu” yeniyetmə və gənclər üçün elmi-praktik konfrans keçiriləcək. Bu haqda məlumatı Cenublu.az bu gün, 16 aprel tarxində verir.
3 may saat 10:00-12:30-dək keçiriləcək konfransda ilk olaraq Lənkəran Dövlət Peşə Təhsil Mərkəzinin, Lənkəran Şəhər Mədəniyyət Mərkəzinin və Lənkəran Peşə Təmayüllü Siniflərinin mövzu ilə bağlı müxtəlif əl işləri sərgilənəcək. Sonra Lənkəran rayonu üzrə təhsil sektorunun tabeliyində olan məktəblər arasından münsiflər heyəti tərəfindən seçilmiş 5 ekoloji təqdimat konfrans iştirakçılarına nümayiş olunacaq. Sonda təqdimatlar mükafatlandırılacaq.
Təhsil müəssisələri yalnız 1 təqdimatla təmsil oluna bilərlər. Təqdimatları 20 aprel tarixinə kimi [email protected] ünvanına (məktəbin və təqdimatın adını qeyd etməklə) göndərmək tələb olunur.
Lənkəran–Astara Regional Təhsil İdarəsinin Lənkəran rayonu üzrə təhsil sektoru və Lənkəran Dövlət Peşə Təhsil Mərkəzinin təşkilatçılığı ilə baş tutacaq konfransın məqsədi “Yaşıl Dünya Naminə Həmrəylik İli” çərçivəsində ümummilli lider Heydər Əliyevin tövsiyələrinə əsasən, yeniyetmə və gənclərin ətraf mühitin mühafizəsində iştirakının artırılmasından ibarətdir.
Qeyd edək ki, tərəfdaşlar Lənkəran Şəhər İcra Hakimiyyəti, Lənkəran “ASAN xidmət” Mərkəzi, Ekologiya və Təbii Sərvətlər Nazirliyinin 1 saylı Regional Ekologiya İdarəsi, Lənkəran Şəhər Mədəniyyət Mərkəzidir.
