Fövqəladə Hallar Nazirliyinin Dövlət Yanğın Nəzarəti Xidməti Lənkəranda yanğın təhlükəsizliyi ilə bağlı əhalinin maarifləndirilməsi məqsədilə silsilə tədbirlər keçirib. Bu haqda məlumatı Cenublu.az bu gün, 26 avqust tarixində verir.
Belə ki, Lənkəran Tibb Kollecində, Lənkəran şəhər 1 saylı Ailə Sağlamlıq Mərkəzi və Lənkəran şəhər 5 saylı Körpələr Evi - Uşaq Bağçasında, Hirkan Milli Parkında və Masallı meşəbəyliyində yanğına qarşı maarifləndirmə tədbirləri baş tutub.
Tədbirlərdə yanğınların başvermə səbəbləri və qarşısının alınması yolları, yanğın zamanı zəruri davranış qaydaları barədə məlumat verilib və ilkin yanğınsöndürmə vasitələrindən istifadə qaydaları nümayiş etdirilib.
Eləcə də Masallı Regional Meşə Təsərrüfatı Mərkəzinin 23 saylı dolayında və Cəlilabad meşəbəyliyində yanğından mühafizə məqsədilə şumlama və meşə dolayına yanğın avtomobillərinin sərbəst yanaşması üçün torpaq yolların salınması işləri aparılıb.
Bundan başqa, Lənkəran şəhərinin 20 Yanvar küçəsində, Astara şəhərinin 28 May küçəsində, Masallı Regional Meşə Təsərrüfatı Mərkəzinin Masallı meşəbəyliyində quru otların, kol-kos və məişət tullantılarının təmizlənməsi təmin olunub.
