Lənkəran şəhər İcra Hakimiyyəti rayonda son 10 ildə kommunal sahədə görülən tikinti, təmir-bərpa, abadlıq və yenidənqurma işləri haqda məlumat paylaşıb.
2012-2023-cü illər ərzində rayonun qazlaşdırılmasında mühüm işlər görülüb və Lənkəranın 95,9 faiz ərazisi tam qazlaşdırılıb. Lənkəranda ümumi təsərrüfat sayı 50.242-dir ki, 2012-ci il yanvar ayının 1-ə olan məlumata görə, 13.086 fərdi ev qazla təmin olunduğu halda, 2023-cü ildə bu rəqəm 48.118-ə yüksəlib. Cari ildə Daşdatük, Moloja və Aşağı Apu kəndlərinin qazlaşdırılması nəzərdə tutulur.
2018-ci ildə Lənkəranda 2x20 MVA gücündə 110/35/10 kv-luq Lənkəran-2 yarımstansiyası quraşdırılıb. Lənkəran şəhəri, rayonun Aşağı Nüvədi və İstisu qəsəbələri, Şiləvar, Digah, Sütəmurdov, Velədi, Küvənil, Səpnəkəran, Yuxarı Nüvədi, Kənarmeşə, Seydəkəran, Şilim, Girdəni, Şürük, Türkəkəran, Tütəpeştə, Moğonojoba, Xolmili, Şıxəkəran və Viyən kəndlərində yeni elektrik dirəkləri, xətləri çəkilməklə və transformatorlar quraşdırılmaqla elektrik təsərrüfatı yenidən qurulub.
Bundan başqa, Lənkəran şəhəri küçələrinin, o cümlədən aeroport yolundan Şağlaküçə ipək yolunadək olan ərazinin ən müasir işıqlandırma sistemi ilə təmin olunması istiqamətində uzunluğu 98.482 metr olmaqla, 144 küçəni əhatə edən 3090 ədǝd müasir tipli işıq dirəyi quraşdırılıb. Yeni inşa edilmiş Ələt-Astara avtomobil yolunun Girdəni istiqamətindən şəhərə girişi, həmçinin rayonunun Qurumba kəndində inşa olunan “ASAN xidmət” mərkəzinə aparan avtomobil yoluna yeni elektrik dirəkləri quraşdırılmaqla və xətləri çəkilməklə müasir tələblər səviyyəsində işıqlandırılması təmin olunub.
Qeyd edək ki, Lənkəranın tam işıqlandırılması üçün 3-cü mərhələdə ipək yolu körpüsündən Səpnəkəran kəndinə kimi uzunluğu 6400 metr olmaqla 185, Liman şəhərində uzunluğu 31.080 metr olmaqla 926, Səpnǝkǝran körpüsündən Xanbulan iqamətgahına kimi uzunluğu 6600 metr olmaqla 220, Xanbulandan Astaranın girişinə kimi uzunluğu 2100 metr olmaqla 70 ǝdəd işıq dirəyinin quraşdırılması nəzərdə tutulub. Bu mərhələdə ümumilikdə uzunluğu 46.180 metr olmaqla 1401 ədǝd işıq dirəyi quraşdırılacaq.
Lənkəranın içməli su təchizatının yaxşılaşdırılması istiqamətində də 2012-2023-cü illər ərzində mühüm addımlar atılıb. Belə ki, 2013-cü ildə Lənkəran şəhərində yeni içməli su xəttinin çəkilişinin açılışı mərasimində Prezident İlham Əliyev iştirak edib. Bundan başqa, Şiləvar, Digah, Sütəmurdov və Velədi kəndlərində yeni içməli su xətləri çəkilərək istifadəyə verilib.
Bütün bunlarla yanaşı, qeyd edək ki, 300-dən artıq çoxmənzilli yaşayış binasının dam örtüyü dəyişdirilib.
