19 ixtisas üzrə 400-dən çox tələbənin oxuduğu Lənkəran Peşə Təhsili mərkəzi yenidən qurulur. Bu haqda məlumatı Cenublu.az bu gün, 24 fevral tarixində verir.
Mərkəz, əsasən, rayondakı əmək bazarına uyğun peşələr üzrə kadr yetişdirir. Mütəmadi olaraq işəgötürənlərlə əməkdaşlıq edilsə də, köhnə maddi texniki baza liseydə müasir əmək bazarı üçün kadrlar hazırlamağa tam imkan vermirdi. Peşə liseyinin yenidən qurulması artıq bu problemləri geridə qoyacaq.
Tikintisinə 2021-ci ilin iyulunda başlanılan mərkəzdə tədris və idman korpusu, emalatxana, kulinariya, avtotəmir, hotel və yataqxana olmaqla 7 korpusun xidmətə verilməsi nəzərdə tutulur.
Bölgədə, əsasən, aqrar sahə üzrə kadrlara ehtiyac olduğundan mərkəzdə əkinçilik və istixana laboratoriyası və ağıllı istixana qurulacaq.
İşlərin artıq 85-90%-i tamamlanıb. Bəzi korpuslarda avadanlıqların bir hissəsi quraşdırılıb. Bundan əlavə, bölgədə ilk olan emalatxanalardan biri də yeni mərkəzdə fəaliyyətə başlayacaq.
Daha bir korpus isə 520 kvadratmetr sahədə yaradılan avtotəmir emalatxanasıdır. Burada bölgədə ilk dəfə olaraq elektromobil və hibrid avtomobillərin diaqnostikası həyata keçiriləcək.
Yenidənqurma işlərinin may ayında başa çatdırılması, mərkəzin yeni tədris ilinə tələbələrin ixtiyarına verilməsi nəzərdə tutulur. Hazırda 400 nəfərin oxuduğu Peşə Təhsili Mərkəzinin yeni binası istifadəyə verildikdən sonra tələbələrin sayı 2 dəfədən çox artacaq.
